அதிரையர்களே உஷார்..! சமூக சேவை என்று சொல்லி கல்லா கட்டும் "மிஸ்டர் X" - முட்டு கொடுக்கும் பூமர்ஸ்

அதிரையில் பல்வேறு அரசியல் கட்சியினர், இயக்கத்தவர்கள் மற்றும் சமூக ஆர்வலர்கள் பலர் தங்கள் பணிகளை ஒதுக்கி வைத்துவிட்டு சமூக நலப்பணிகளை செய்து வருகின்றனர். இதனால் வழக்குகளும் கைதும் சிறையுமே பல நேரங்களில் அவர்களுக்கு பரிசாக கிடைத்துள்ளது.

ஆனால் அதிரையில் சில ஆண்டுகளாக ஒருவர் தன் பெயருக்கு முன்னால் சமூக ஆர்வலர் பட்டத்தை சேர்த்து கொண்டு பத்திரிகையாளர் போன்று தன்னை காட்டிக்கொண்டு தனக்கு மட்டுமே சமூக நலனில் அக்கறை இருப்பதை போல் தம்பட்டம் அடித்து பிழைப்பு நடத்தி வருகிறார்.

இரு நபர்களுக்கிடையே பிரச்சனை ஏற்பட்டாலோ பொது பிரச்சனை, விவகாரம் என்றாலோ ஒரு தரப்புக்கு சாதகமாக பேசுவது, அவரிடம் பேசி ஆடியோ, வீடியோவை பகிர்வது, என்னால்தான் இந்த பிரச்சினையை முடிக்க முடியும் என்று  கூறி மறைமுகமாக பணத்தை கேட்பதாக கூறுகின்றனர் தொடக்கத்தில் இவரை நம்பியவர்கள்.

இருவருக்கிடையே எளிதில் முடிய வேண்டிய பிரச்சினையை முடிக்கவிடாமல் தனது வாழ்வாதாரத்திற்கு நங்கூரம் போட்டுவிடுவதாக அவர்கள் வேதனை தெரிவிக்கின்றனர். அதிரையில் ஒருவருக்கு எதிராக ஒருவரை கொம்பு சீவிவிடும் இவரிடம் தொழில் என்னவென்று கேட்டால் உடன் இருப்பவர்களுக்கே தெரியாது. பாதிக்கப்பட்டவர்களிடம் கேட்டால் அனைவரும் வார்த்தையில் முடித்து கொள்கிறார்கள் "அது கட்டப்பஞ்சாயத்துங்க" என்று.

தனிநபர்களிடம் தனது வித்தையை காட்டியவர் தேர்தல் நேரத்தில் அதிரையில் இருக்கும் அரசியல் கட்சிகள் மற்றும் இயக்கங்களிடையே கொம்பு சீவும் வேலையையும் வேட்பாளர்களிடம் பணம் பறிக்கும் வேலையை செய்ததாக கூறப்படுகிறது. அவ்வப்போது முக்கிய அரசியல் புள்ளிகளிடம் பணம் பெற்றுக்கொண்டு ஜால்ரா போடுவதும் இவரது வழக்கம். அதிரையில் இயங்கும் இயக்கங்கள் மற்றும் கட்சிகள் விழித்துக்கொள்ள வேண்டும். இந்த வியாபாரியிடம் இனிமேலாவது அதிரையர்கள் ஏமாறாமல் உஷாராக வேண்டும் என பாதிக்கப்பட்டவர்கள் எச்சரிக்கின்றனர்.

கடந்த முறை இந்த செய்தியை வெளியிட்டதற்காக அதிரை பிறை மீது அந்த மிஸ்டர் X வாட்ஸ் அப்பில் அவதூறு பரப்பி வருகிறார். அவர் மீதான குற்றச்சாட்டுகளுக்கு நம்மிடம் ஆதாரங்களும் உள்ளன. இதேபோல் அவதூறு பரப்புவது, ஆட்களை வைத்து மிரட்டுவது போன்றவற்றை செய்தால் அடுத்தக்கட்ட சட்ட நடவடிக்கைகளில் அதிரை பிறை இறங்கும்.