அப்போது முதல் முறையாக நமது அதிரை பிறை, காஸ்டிக் சோடா தொழிற்சாலையால் ஏற்படும் பாதிப்புகளை அம்பலப்படுத்தியது. இதனை மற்ற கட்சிகள் அப்போது போஸ்டராக அடித்தும் தேர்தல் பிரச்சாரங்களில் பேசிய திமுகவை விமர்சித்தனர். அந்தத் தேர்தலில் பட்டுக்கோட்டை தொகுதி மட்டுமின்றி தமிழ்நாட்டிலும் தோல்வியடைந்த திமுகவால் காஸ்டிக் சோடா தொழிற்சாலை திட்டத்தை கொண்டு வர முடியவில்லை.
5 ஆண்டுகளுக்குப் பிறகு கடந்த 2021 சட்டப்பேரவைத் தேர்தலில் திமுகவின் மாவட்டங்களுக்கான தேர்தல் அறிவிக்கப்பட்டது, மீண்டும் காஸ்டிக் சோடா தொழிற்சாலை திட்டம் அறிவிக்கப்பட்டது. அப்போது பலர் தி.மு.க.வின் தேர்தல் அறிக்கைகளில் உள்ள பல்வேறு திட்டங்கள் பற்றி பேசிக்கொண்டிருக்கையில், அதிரை பிறை, நமதூருக்கான வாக்குறுதிகள் என்னென்ன என்பதை ஆராய்ந்தபோது, இதை நாம் படித்து அதிர்ச்சி அடைந்தோம்.
இந்த திட்டத்தினால் ஏற்படும் பாதிப்புகள் குறித்தும், இதனால் ஏற்கனவே பாதிக்கப்பட்ட காயல்பட்டினத்தின் நிலைகுறித்தும் மக்களுக்கு தெரியப்படுத்தப்பட வேண்டும் என எண்ணி அதன் பாதிப்புகள் குறித்து அதிரை பிறையில் "அதிரையர்களை புற்றுநோயாளிகளாக்கும் திட்டத்தை அறிவித்த திமுக" என்ற செய்தியின் மூலம் அம்பலப்படுத்தினோம்.
அதிரை பிறையின் இச்செய்தியை வாசித்த அதிரை மக்கள், சுற்றுச்சூழல் ஆர்வலர்கள் திமுக இதை நிறைவேற்றக்கூடாது என வலியுறுத்துகின்றனர். பட்டுக்கோட்டை தொகுதி திமுக வேட்பாளர் கா.அண்ணாதுரை அவர்களிடமே இதுகுறித்து அவர்கள் அறிவித்தனர்.
சென்ற தேர்தலை போலவே 2021 தேர்தலில் இந்த பிரச்சனையை மற்ற கட்சிகளும் கையில் எடுத்தன. குறிப்பாக அதிரையில் நடைபெற்ற தேர்தல் பிரச்சார பொதுக்கூட்டத்தில் அமமுக-எஸ்.டி.பி.ஐ கூட்டணியில் உள்ள ஏ.ஐ.எம்.ஐ.எம் கட்சியின் தலைவரும் ஐதராபாத் எம்.பியுமான அசதுத்தீன் உவைசி அதிரை பிறையால் அம்பலப்படுத்திய திமுகவின் தேர்தல் அறிவிப்பில் இடம்பெற்றுள்ள காஸ்டிக் சோடா தொழிற்சாலை குறித்து பேசினார்.
காஸ்டிக் சோடா தொழிற்சாலையால் அதிரையின் சுற்றுச்சூழல் பாதிக்கப்படும் என்றும், இந்த தொழிற்சாலை அதிரைக்கு தேவையில்லை என்றும் அவர் தெரிவித்தார்.
இதுவும் மக்களிடையே பெரும் தாக்கத்தை ஏற்படுத்தி திமுக தரப்புக்கு நெருக்கடி அதிகரித்துள்ளது.
இந்த நிலையில் தான் தற்போது நகர்புற உள்ளாட்சித் தேர்தல் அறிவிக்கப்பட்டுள்ளது. இதில் போட்டியிடும் SDPI கட்சி வெளியிட்ட தேர்தல் அறிக்கையை திமுக அரசு கொண்டு வரும் விஷக்கொள்ளை காஸ்டிக் சோடா தொழிற்சாலையை அனுமதிக்க மாட்டோம் என தெரிவித்துள்ளனர்.
இதனால் மக்களிடையே மீண்டும் காஸ்டிக் சோடா தொழிற்சாலை குறித்த பேச்சு மேலோங்கத் தொடங்குகிறது. ஏற்கனவே சிறைவாசிகள் விடுதலை, வார்டு மறுவரையறை விவகாரத்தால் மக்கள் அதிருப்தியில் உள்ள நிலையில் காஸ்டிக் சோடா விவகாரம் திமுகவுக்கு தலைவலியாக இருந்து வருகிறது. இதில் நகர திமுக நிர்வாகம் தரப்பில் இருந்து எந்த விளக்கமோ உத்திரவாதமோ வரவில்லை.
அரசியல் கட்சிகள் அறிவிக்கும் திட்டங்களை மட்டும் அப்படியே போடாமல் அதில் உள்ள பாதிப்புகள் குறித்து அலசுவதே அதிரை பிறையின் பணி. 6 ஆண்டுகளுக்கு முன் அதிரை பிறை வரை உண்மை தீ, 3 தேர்தல்களில் திமுகவுக்கு சிம்ம சொப்பனமாக அமைந்திருக்கிறது.
