Ads: Crescent builders - Coming Soon
பெற்றோர்கள்:
- 18 வயதுக்கு உட்பட்ட பிள்ளைகளை வாகனம் ஓட்ட அனுமதிக்கும் பெற்றோர்கள் மீது சட்டப்படி நடவடிக்கை எடுக்க முடியும் என்பதை அறிந்துகொள்ளுங்கள்.
- 18 வயதை கடந்தாலும் ஓட்டுநர் உரிமம் பெறாமல் வாகனங்கள் ஓட்ட அனுமதிக்காதீர்கள்.
- பதின் பருவத்தில் உள்ள உங்கள் பிள்ளைகளை உளவியல் ரீதியாக அணுகி மனம்விட்டுப் பேசி திருத்த முயற்சி செய்யுங்கள்.
- ரேசிங் வீடியோ கேம்கள், பைக்கர்கள், ரேஸ் தொடர்பான யூடியூப் சேனல்களை பார்க்க அனுமதிக்காதீர்கள்.
- நெடுந்தூர பைக் பயணம் மேற்கொள்ளவும், தேவையின்றி நண்பர்களுடன் பைக்கில் செல்லவும் விடாதீர்கள்.
பொதுமக்கள்:
- இளைஞர்கள் வேகமாக போகிறார்கள் என்று குறை சொல்லிக்கொண்டே பெரியவர்கள் பலர் செல்போன் பயன்படுத்தியபடி வாகனம் ஓட்டுகிறார்கள். இதன் மூலமாகவும் ஏராளமான விபத்துகள் ஏற்படுகின்றன.
- வாகன முகப்பு விளக்கில் “ஹை பீம்” போட்டு வருவதால் எதிரில் வாகனத்தில் வருபவர்களின் பார்வை மறைந்து விபத்துகள் ஏற்படுகின்றன. எனவே ஊருக்குள் பயணிக்கும்போது “டிம் லைட்” போட்டு செல்லுங்கள்.
- பள்ளிவாசல்கள், மதர்சாக்கள், பள்ளி, கல்லூரி, மருத்துவமனை, மார்க்கெட் என மக்கள் கூடும் பகுதிகளில் மித வேகத்தில் செல்லுங்கள்.
- சுயநலனுக்காக வீட்டு வாசல்களில் சாலையை தோண்டி சொந்தமாக வேகத்தடை அமைப்பதாலும் விபத்துகள் ஏற்படுகின்றன.
- கட்டுமானப் பணிகள் நடந்தால், ஜல்லி, மண், செங்கல் போன்றவை சாலையில் சிதறிக்கிடக்காமல் பாதுகாத்துக்கொள்வதன் மூலமாகவும் விபத்துகளை தவிர்க்க முடியும்.
- அருகில் செல்ல பைக்குகளை பயன்படுத்தாமல் நடந்தோ, சைக்கிளிலோ சென்றால் உடல் நலனுக்கும், சுற்றுச்சூழலுக்கும் நண்மை கிடைக்கும்.
இளைஞர்கள்:
- அல்லாஹ் நம்மை உன்னத நோக்கத்திற்காக படைத்து இவ்வுலகிற்கு அனுப்பியுள்ளான். பெற்றோர்கள் நம்மை கஷ்டப்பட்டு வளர்த்து வருகிறார்கள். இதையெல்லாம் அர்ப்ப சுகம், பந்தாவுக்காக நொடிப்பொழுதில் பாழாக்கிவிடாதீர்கள்.
- அதிவேகமாக பைக் ஓட்டி விபத்து ஏற்பட்டால் நீங்கள் மட்டுமின்றி எந்த தவறும் செய்யாத அப்பாவிகளும் பாதிக்கப்படுவார்கள்.
- விபத்து ஏற்பட்டு உயிருக்கு ஆபத்தாக முடியும் என்று தெரிந்தும் அதிவேகமாக பைக் ஓட்டி ஏதாவது அசம்பாவீதம் நேர்ந்தால் அது தற்கொலை அல்லது கொலைக்கு ஈடாகிவிடும்.
- சிறு வயதில் ஆர்வ மிகுதியில் அதிவேகமாக பைக் ஓட்டி விபத்தில் சிக்கி உடல் உறுப்புகளை இழந்து தற்போது வருத்தப்படும் பலர் நமதூரிலேயே உள்ளார்கள்.
- இன்று உங்களை வேகமாக பைக் ஓட்ட ஊக்குவிக்கும் நண்பர்கள், நீங்கள் விபத்தில் சிக்கி உடல் உறுப்புகளை இழந்தால் சில ஆண்டுகளில் உங்களை மறந்து தங்கள் வாழ்க்கையை தேடி சென்று விடுவார்கள். கடைசி வரை உங்களுடன் இருக்கப்போவது பெற்றோர் மட்டும்தான்.
- உங்கள் உயிரையும், எதிரில் வருபவர்களின் உயிரையும், உங்கள் பெற்றோரின் கனவுகளையும் சிதைக்கும் வகையில் அதிவேகமாக பைக் ஓட்டுவது வீரம் இல்லை.
- வேகமாக பைக் ஓட்டும் உங்கள் நண்பர்களை திருத்த முயற்சியுங்கள். கேட்க மறுத்தால் நீங்கள் அவர்களுடன் பைக்கில் செல்வதை தவிர்த்துக்கொள்ளுங்கள்.
- உங்கள் வயதுக்கு ஏற்ற வீரத்தை காட்ட தற்காப்பு பயிற்சிகளை கற்றுக்கொள்ளுங்கள். சமூக பணியாற்ற வாருங்கள். அநீதிகளுக்கு எதிராக துணிச்சலுடன் குரல் கொடுங்கள். போராடுங்கள்.
- நூருல் இப்னு ஜஹபர் அலி
