கடந்த 2019 ஆம் ஆண்டு திருவாரூர் - காரைக்குடி இடையே ரயில் சேவை தொடங்கப்பட்டது. ஆனால், கேட் கீப்பர் இல்லாத காரணத்தால் பல இடங்களில் நிறுத்தி நிறுத்தி ரயில்கள் இயக்கப்பட்டன. இதனால் பயண நேரம் தாமதமானது. 2 ஆண்டுகளுக்கு பிறகு கேட் கீப்பர்கள் நியமிக்கப்பட்டதால் தற்போது பயண நேரம் பாதியாக குறைந்துள்ளது. இருப்பினும் அகல ரயில்பாதை அமைக்கப்பட்டு 4 ஆண்டுகளாகியும் இப்பகுதி மக்களின் முக்கிய கோரிக்கையான சென்னைக்கு நேரடி ரயில் இயக்க வேண்டும் என்பது நிறைவேற்றபடாத ஒன்றாகவே இருந்து வந்தது.
இந்த நிலையில் கடந்த ஆண்டு அதிரை வழியாக சென்னை செல்லும் செகந்திராபாத் வாரந்திர ரயில் சேவை தொடங்கப்பட்டது. இவ்வழியாக சென்னை எழும்பூர் செல்லும், அதிரையில் நின்று செல்லும் ஒரே ரயிலான இது தற்காலிகமாக நிறுத்தப்பட்டு இருக்கிறது. ஆனால், 2 அல்லது 3 வாரங்களுக்கு மட்டுமே நிறுத்தப்படுவதாகவும், இதை நிரந்தர சேவையாக்க முயற்சிப்பதாகவும் தெற்கு ரயில்வே அதிகாரி ரயில் பயணிகள் சங்கத்திடம் தெரிவித்துள்ளார்.
